Mat 21 | APZ | STEP | (Mak 11:11; Luk 19:28-40; Joun 12:12-19) Hofɨko Jelusalem mofone sopo i'mofapontɨfi ango Mpetɨfase hwofɨki'nyo Oulif osopo humamentohofofoho. Osopo Jisas nohumanto kakoe inomokomoyo sohwa'umo ole lɨhwatɨmento,

Matthew 21

Jisas hwe yofe engo'njo pa'nyo ango Jelusalemno humentisofoho.

(Mak 11:11; Luk 19:28-40; Joun 12:12-19)

1 Hofɨko Jelusalem mofone sopo i'mofapontɨfi ango Mpetɨfase hwofɨki'nyo Oulif osopo humamentohofofoho. Osopo Jisas nohumanto kakoe inomokomoyo sohwa'umo ole lɨhwatɨmento, 2 Siko oso ango we'e nonjo lopo nuhusɨsi oso hopo sopo siko ahwomo yahutoungki hofɨko impe intofahumalofoso kakoe mu hi'nji wotɨpemanjiyoho. Oso yahu sohwa'u ikwolofo mahosɨsi ngkiyepono motapinyo. 3 I hwe fihwo sikimo hungkuno selɨhwoso'no'manji ole ulinyo. Nakwoe Hwe Engo sohwo kako olo yahu lohumne'no syoho weho. Ose ulahosisyo'no kako komo'no uhwojapmmontonoho. Ose lɨhwajɨmentisofoho.

4 Oso hiso imo'nɨngkahonɨngki oso a'amu sohumo Anɨtu hungkuno uyahonɨngki lɨmojo sohwoe hungkuno ne imo'nɨmentisofoho. Hungkunoso olenoho.

5 A'amu ango Saiyon sopo humalofo somo ole ulɨmno.
Uhwonɨmno. Sekwoe Hwe Engo sekuyepono ntopohoho.
Kako hwe yofe ane pa'nyo ahwomo yahupo kehumaho.
Oso yahu hiso ho'yango mokaho'nyo'nefoho.
6 Oseso inomokomoyo hufa'u sohwa'u nowenji yo'mayo Jisas ulɨmentiso hopa imentisiyefoho. 7 Siko yahu kona'wohi'nji kakoe mu'nji nomotaponji sikoe manji'mofoso yahupo miyopeehumentisiye sopo Jisas kehumamentisofoho. 8 Hwe moya'mi pi'nɨngo engoso hofɨko hofɨkoe hwapɨfe Jisas kako hano wene honɨngkano sopo hu'meehumentohofofoho. A'amu fehohnjo ipamo lopo'memantɨfi Jisasɨye yofe ho'nomayo'ne honɨngkanopo hu'meehumentohofofoho. 9 Hwe hwoya'mi sɨmo'mjo so'nji tɨfinjo so'nji hofɨko joho ole lɨmentohofi

Ntefitɨye Imu sohwoe yofe woho'nomano.
Kako wopɨngo'nohini hweho.
Olo hwe lohumo nakwoe Hwe Engo Anɨtu sohwo nakwoe hwahopone'no uhwatɨmentiso hweho.
Kakoe yofe woho'nomano.
Anɨtu ahwomomo humaso sohumo isamoyoka ulano.
Ose lɨmentohofofoho.

10 Jisas Jelusalemno noswahonɨngki oso hopo soponjo hwe moya'mi hofɨko yomo yontɨfi ulɨmentohofi, Olo hwe lohwo tɨhwolo. 11 Ose ulohonɨngkahonɨngkofi hwe moya'mi Jisasɨ'nji pmmentohofoso ulɨmentohofi, Olo Jisas Anɨtuye hungkuno lɨwo'nɨngkiso hweho. Ango Nasalet hwaho Ngkalilinta'ango hweho. Ose ulɨmentohofofoho.

Jisas Anɨtuye tajo ango engo somo a'amu mpe yontanɨngkofi a'amu yo'mayo somo wae yao'mentisofoho.

(Mak 11:15-19; Luk 19:45-48; Joun 2:13-22)

12 Jisas Anɨtuye tajo ango engo somjo mempo ango somo noswonto a'amu yo'mayo mpe yontanɨngkofo somo wae yao'mentisofoho. Hofɨkoe ijempoho hamniyoho iwolo'mokomayo yontɨfe ho'nasiyo'ne so'nji a'amu yɨhufo mpe uyantɨfi epohumayo yɨwo'nɨngkohofoso Jisas kako mehu'mee'mentisofoho. 13 Wayo yaofonto Jisas ulɨmento, A'amu Anɨtuye hungkuno mtɨ'mokumento sohwa ole mtɨ'mokumentohofi, Olo nje ango somne'no ole lɨfitnnefoho. Mpohumo jomo ujo'ne angofoho. I oso hiso'no nje ango loso sekwo a'amu hamniyoho hiyaso'mo hufo mawo'nɨngkohofo sohwafe ango hopa imokalokwofo. Ose mtɨ'mokumentohofofoho ulɨmentisofoho.

14 Jisas tajo angomo nohumentanɨngki a'amu tɨmpi'nyo so'nji sɨfe wonyo'njo so'nji kakimo u'ma'mentohofofoho. Nu'mahonɨngkofi Jisas wopɨngo umokumentisofoho. 15 Oseso hwe yofe engo'njo tajo ango syoho'njo sohwanji a'amu honɨngkano hungkuno lutɨhwayo syoho'njo sohwanji hofɨko uhwonɨmentohofoso Jisas a'amu wopɨngo umokumentisoso uhwonontɨfi upa'nɨmentohofoso mehomi tajo ango somo Jisasɨmne'no joho ulɨmentohofi, Ntefitɨye Imu sohwoe yofe woho'nomano. Ose lontanɨngkofi nupa'nontɨfi hofɨko sɨmano hintotohino umnɨmentisofoho. 16 Sɨmano hintotohino umnɨngkahonɨngki Jisasɨmo ulɨmentohofi, Olo hungkuno mehomi lohwa lalokwofo loso nto lupa'nɨngkino. Ose ulohonɨngkahonɨngkofi Jisas ulɨmento, Ou, upo'nalokweno. Sekwo olo hungkuno loso'no huno maseyo'njotaho. Hungkuno ole,

Mehomi engo so'nji mehomi milongo so'nji jɨje yofe woho'nokumapɨfe.
17 Ose ulonto, nuhwotɨ'mofonto Jelusalem mta'ni noswaponto ango Mpetani'no nowento osopo saho fosyawo'mentisofoho.

Ikwongo yofoho imentisofoho.

(Mak 11:12-14, 20-24)

18 Imɨngo'nji Jisas Jelusalemno asomo sɨmentisoso mijoho engo uyɨmentisofoho. 19 Kako uhwonɨmentisoso ikwongo honɨngkano lopo lohofontanɨngki uhwononto oso hopo sopono umentisofoho. U, oso homo somo ikwonjayo anefoho. Swo'nohinofoho. Ose uhwononto Jisas iyo somo ulɨmento, Kɨko ne apa'no minto'nɨngkohotnnehino. Nɨhu'nahone hwosoho. Ose ulahonɨngki iyoso yofoho komo'no imentisofoho. 20 Kakoe inomokomoyo sohwa oso hiso nuhwonontɨfi hofɨko yomo imentohofofoho. Yomo yontɨfi lɨmentohofi, Oso iyo yofoho komo'no isoso pipilo. 21 Ose ulahonɨngkofi Jisas ulɨmento, Ngko nehopi waselɨmonne'no yohono. Sekwoe sɨmeho hi'ntnnono nehopi ufijoso u, sekwo sɨmeho hufa'u ane hwasɨ'manji sekwo ngko iyo lomo ulohe hopaso uyantɨfeho. Oso'nohinɨ'maho. O'o, sekwo sɨmeho hi'ntnnono nehopi ufijo'manji sekwo olo hwofɨki'nyo lohumo ole ulɨfijoso, Kɨko nolɨkafohoji oso mijo ayo mompo fɨlɨkofaofo. Ose ulɨfijoso hwofɨki'nyo sohwo wawontonoho. 22 U, sekwo sɨmeho hi'ntnnono nehopi uyɨkuji yo'mayo so'no Mpohumo jomo ulɨfijoso womantɨfeho.

Jisasɨye yokumpohn'nyo hwapɨngo so'no ulohonɨmentohofofoho.

(Mak 11:27-33; Luk 20:1-8)

23 Jisas tajo angomo asomo swonto a'amumo lutɨhwentanɨngki a'amu yofe engo'njo tajo ango syoho'njo sohwanji Isɨlaelɨfe hwe engo sohwanji hofɨko nu'mantɨfi ulɨmentohofi, Kɨko olo syoho iwo'nɨngkino loso tɨhwo kilɨmaso'no iwo'nɨngkinoto. Yokumpohn'nyoso tɨhwo kijapmmaso'nji iwo'nɨngkinoto.

24 Ose ulahonɨngkofi Jisas ulɨmento, Ngko huhwo'nyi hungkuno anga'no waselohonɨmne'no yohono. Olo hungkuno hiloso sekwo asomo ntɨfijo'manji e'wa, yo'mayo yalokwe so'no hwapɨngo waselɨmo. 25 Joun a'amumo mijo kiyoma'mojo sohwo kakoe yokumpohn'nyo hwapɨngoso ntɨ'mta'angoto. Anɨtu mta'angotaho. Hwahoponjo a'amu mta'angotaho. Ose ulohonɨngkahonɨngki hofɨko ole hnnɨmentohofi, Joun kakoe yokumpohn'nyo Anɨtu mta'ni ma'mentisofoho ulaso'manji ole wonalɨmontonoho. Ose'manji sekwo Jounɨye hungkunomo sɨmeho hi'ntnnono muyo'njo peho'neto. 26 I, Joun kakoe yokumpohn'nyo hwahoponjo a'amu mta'ni ma'mentisofoho ulaso'manji hwe moya'mi peho nalohopitnnehofo. Oso'no iyoho nenalofoho. Hwe moya'mi hiso ole syafɨsyɨwo'nɨngkohofi, Anɨtu kako Jounɨmo hungkuno uyahonɨngki nalɨmentisofoho. 27 Ose hnnontɨfi Jisasɨmo ulɨmentohofi, Nakwo huno monayohoyohoho. Ose ulahonɨngkofi Jisas hofɨkimo ulɨmento, Ose'manji ngko huhwo'ni nje yokumpohn'nyo yo'mayo iwo'nɨngkohe hwapɨngo so'no maselɨmnehono. Ose ulɨmentisofoho.

Hwe fihwo hwomu hufa'u'njo sohwoe pahnnɨmo hungkunofoho.

28 Olo hungkuno selohe so'no sekwo huno pipi seyohoho. Hwe fihwo kako hwomu hufa'u'njo hweho. Kako hwomu tisɨmaso sohumo ulɨmento, Nje hwomufo, olohonta nuhuji ipisayo syohomo syoho ntohofiyo. 29 Ose ulahonɨngki kakoe hwomu sohwo ulɨmento, Ngkilaho. Ose ko ulonto hwangku kako huno esyafɨsyonto syoho ulohofimentisofoho. 30 Oseso kanɨngkwohwo nom'ne hwomu sohwoepono nowento oso hungkuno tisɨmaso sohumo ulɨmentisoso apa'no, Ulahonɨngki hwomu sohwo ulɨmento, Ou, Mpohwo, ngko syoho wakilohofimo. Ose ko ulonto kako syoho somne'no mawommentisofoho. 31 Oso'no huno pipi seyohoho. Oso hwomu sohwa'u kanɨngkwohwoe hungkuno somo tɨhwo inɨngkamentono.

Ose ulohonɨngkahonɨngki, Sɨmo'mjo sohweho ulɨmentohofofoho.

I, Jisas ulɨmento, Ngko hungkuno hiso'no yoloho'nohini waselɨmonne'no yohono. A'amu honɨngkano wonyo'njo hamniyoho mayo syoho'njo sohwanji moya'mi hwa'nte sofa honɨngkano wonyo imofɨwo'nɨngkohofo sofanji hofɨko sɨmo'mo Anɨtuye honɨngkano so'no nakwolaho lontɨfi olohonta sɨmeho yɨwolo'mokalokwofo. Oso'no Anɨtuye ango sopone'no sɨmo'mo sepopitnnefoho. 32 Hwapɨngoso Joun a'amumo mijo kiyoma'mojo sohwo sekuyepono pmmentisofoho. Kako honɨngkano wopɨngo imofo setɨhwamentiso so'no i, sekwo sɨmeho hi'ntnnono muyo hwasoho. I, a'amu hamniyoho mayo syoho'njo sohwanji moya'mi honɨngkano wonyo imofɨwo'nɨngkohofo sofanji hofɨko Jounɨye hungkunomo sɨmeho hi'ntinnono uyɨmentohofofoho. Sekwo oso hiso'no ko uhwonontɨfi sekwo huno mɨkwesyafɨsiyo'njo yontɨfi sɨmeho hi'ntnnono muyo hwasoho.

A'amu wonyo ipisayo syoho mokosyohumawo'nɨngkohofo so'no pahnnɨmo hungkunofoho.

(Mak 12:1-12; Luk 20:9-19)

33 Jisas ulɨmento, Sekwo pahnnɨmo hungkuno nom'ne upa'nɨmno. Hwe fihwo hwaho engo'njo sohwo kako ipisayo syoho hulonto tojo emontofasyonto syoho ajwomo'mo ipisayo mijo'ne kompusyoho mtɨ'mokumentisofoho. Ose yonto ango yokintahopo ipisayo syoho somo uhwontohumayo'ne molɨmentisofoho. Ose imentisoso kako oso syoho homo somo mokosyohumayo'ne kako a'amu hamniyoho syoho emawo'nɨngkohofo sohwafe ahomo ho'nosyonto kako ango ikanopo nawento osopo ne'no humamojofoho. 34 Hwangku ipisayo ne mayo sohonta kakoe syoho ulohofiyo sohwamo kakoe ipisayo fehohnjo'ne kakoe ipisayo syoho pone'no uhwatɨmentisofoho. 35 Uhwojahonɨngki a'amu ipisayo syoho mokosyohumayo sohwa kakwo'yohwoe syoho ulohofiyo sohwamo ma'mentohofofoho. Anga'nohino sohumo hwanɨngo fonjontɨfi nom'ne sohumo sojo'nji fongku'mentohofofoho. 36 Ose ulohofahonɨngkofi kakwo'yohwo nom'ne syoho ulohofiyo pi'nɨngo sohwamo uhwatɨmentisofoho. Sɨmo'mjo uhwatɨmentiso sohwa pi'nɨngo'maho. Oso a'amu ipisayo syoho mokosyohumayo huhwo sohwa syoho ulohofiyo sɨmo'mjo hopaso tɨfinjo sohwamo wonyo uloho'mentohofofoho. 37 Hwangku sohonta kakwo'yohwo kakoe hwomu sohumo uhwatɨmentisofoho. Uhwajonto lɨmento, Hofɨko nje hwomufe hungkunomo haloho upeentɨfeho. Ose lɨmentisofoho. 38 I, a'amu ipisayo syoho mokosyohumayo sohwa kakoe hwomu huhwo sohumo uhwonutɨmantɨfi ole hnnɨmentohofi, Olo a'amu lonwo sohwo kako hwangku sohonta kanɨngkwohwoe yo'mayoso nomane hweho. Komo'nohino nakwo kakimo poyo wofonjosyano. Oseso olo kakoe syoholo mane'eno. 39 Ose hnnontɨfi hwomu sohumo nutɨmantɨfi mempo hohnta'ni ipisayo syoho sopo swoho'naofontɨfi osopo poyo nɨhu'nohone fonjahumentohofofoho. 40 Sekwo huno pipi seyohoho. Hwangku oso ipisayo syoho kakwo'yohwo sohwo kako nopɨhwosi a'amu syoho mokosyohumayo huhwamo pipi uloho'montolo.

41 Ose ulohonɨngkahonɨngki a'amu sohwa Jisasɨmo ulɨmentohofi, Kako nopɨhwosi a'amu huhwo sohwamo nɨhu'no wonyo ulohofɨhwosi poyo umokumontonoho. I ose yososo kako kakoe ipisayo syohoso nom'ne a'amu mokosyohumayo sohwamo umontonoho. Osohwa sɨkuno ipisayo ne mjiyo sohonta hofɨko kakwo'yohumo neso uyantɨfeho.

42 Ose ulahonɨngkofi Jisas ulɨmento, Anɨtuye hungkuno loso'no sekwo huno maseyo'njotaho. Hungkuno ole,

Olo sojo engkwosaho pa'nyo a'amu ango injuwo'nɨngkohofo sohwa wae yao'mentohofo loso,
olohontajo engkwosaho loso angomo sosofitofo'ne hwapɨngohwo imo'nɨngkohoho.
Nakwoe Hwe Engo sohwo ole lɨmentisoso imo'nɨmentisofoho.
Nakwo olo so'no uhwonontaneso wonyoangkafofoho lalokuhwono.
Oso pahnnɨmo hungkunoso Anɨtu lɨmentisofoho.

43 Oseso ngko sekumo waselɨmonn'no yohono. Anɨtu kako a'amumo mokosyohumayo sopo sekwoe angoso sekumta'ni semahwosi nom'ne a'amu ne wopɨngo ito'nohino somo umontonoho. Ose ulonto pahnnɨmo hungkuno a'amu kakimne'no minɨngkayo'njo somne'no ulɨmentisofoho. 44 [Olo engkwosaho loso'no seloheso a'amu fihwo oso sojo engkwosaho pa'nyo homo somo entofomahwosi pɨwasyososo oso a'amu hiso kakoe a'apaho kempi mtɨ'mtɨ'me lohofɨhwosi wahu'mehinawo'montonoho. I, oso'no oso engkwosaho huhwo sohwo kako a'amu fihwoe a'apahopo pɨwasyososo fonjomtɨhupeeofososo oso hwe huhwo sohwo kakoe a'apahoso hintalinyo pi'nɨngo umo'nɨmontonoho.]

45 A'amu yofe engo'njo tajo ango syoho'njo sohwanji a'amu Falisi sohwanji Jisasɨye pahnnɨmo hungkunomo upa'nontɨfi hofɨkine'no hungkuno hiloso lɨmentiso so'no huno umentisofoho. 46 Oseso hofɨko kakimo aho wokantɨfi ko imentohofoso hofɨko hwe moya'mimne'no iyoho unɨmentisofoho. Hwapɨngoso hwe moya'mi ole syafisyɨwo'nɨmentohofi, Jisas sohwo Anɨtuye hungkuno lɨmojo hweho. Ose lɨmentohofofoho.